VALENTÍN PAZ ANDRADE

Unha aproximación á vida e obra de Paz Andrade da man dunha selección de vídeos, varios deles resultado do bo traballo feito en distintos centros educativos da nosa comunidade autónoma.

Build your own custom video playlist at embedr.com compare web hosting

A MÚSICA DA PRIMAVERA

Na primavera escoitamos o chiar dos paxaros. Recibámola escoitando músicas inspiradas na propia primavera e nos seus sons:

Build your own custom video playlist at embedr.com top web hosting

A PEPA ARDEU MAL

Nas crónicas da historia de Tui non falta un triste episodio que ten como protagonista á Constitución de 1812: a súa exemplarizante queima no céntrico Paseo da Corredoira.
É bastante probable que os pirómanos físicos e ideolóxicos de tan triste suceso non tiveran lido o documento que entregaban ao lume destrutor.
Tamén é moi probable que, coa súa acción, pensaran queimar un libro e, tamén de paso, destruír as ideas que o tal libro defendía e garantía.
Se iso pensaron non estiveron no certo porque os libros arden mal (está dito por Manolo Rivas no título dunhas das súas novelas) e as ideas son incombustibles: pódese matar ao mensaxeiro mais sempre quedará a mensaxe.
Puideron acabar con algúns dos pais desa modélica constitución,
puideron berrar "Vivan as cadeas!",
puideron incendiar a convivencia...
mais das cinzas xurdiu cal renovada ave fénix, a semente que, agochada en fértil terra, había de dar unha boa colleita de liberdades das que hoxe podemos gozar.
Por iso hoxe podemos celebrar os dous séculos dunha Pepa que ardeu mal,
Por iso hoxe podemos seguir lendo A Pepa
Por iso hoxe podemos festexar a Pepa coa palabra, coa música, co teatro...

1812-2012: duascentas primaveras coa Pepa. Viva a Pepa!

Build your own custom video playlist at embedr.com best web hosting

ANXOS FEMININOS EN RIBADAVIA

Nos anos corenta, o diplomático Ángel Sanz Briz, coñecido como “o anxo de Budapest”, foi a salvación duns cinco mil xudeus. Pola mesma época as irmás Lola, Amparo e Julia Touza Domínguez eran, en Ribadavia, a cabeza visible dunha rede clandestina que ocultaba xudeus e facilitaba, a través da fronteira portuguesa, a súa marcha cara países onde quedarían a salvo das gadoupas do nazismo. Esta filantrópica labor acaba de saír do esquecemento grazas ás reportaxes xornalísticas (El Mundo, La Opinión, La Región) e do programa da TVG Reporteiros (do pasado 4 de febreiro, véxase o vídeo a partir do minuto 24).

Din que os anxos non teñen sexo, é mentira: os anxos de Ribadavia chamábanse Lola, Amparo e Julia e tiñan sexo feminino; elas, sen máquina de escribir, redactaron a súa particular lista de Schindler cos nomes dos xudeus perseguidos que, grazas á súa colaboración, renaceron en novos territorios de acollida. Para elas o noso recoñecemento e a nosa lembranza neste 8 de marzo, Día da Muller; porque elas, aínda que silenciadas pola historia dos grandes acontecementos e dos sonoros nomes, sempre ocuparán un sobranceiro lugar nos corazóns e nos pensamentos de cantos cremos na humanidade e na solidariedade; porque elas, xenerosas e boas mulleres, son escintilantes faros que alumean os camiños da xustiza e do amor aos semellantes nun mundo, moitas veces, demasiado pouco humano.

Lola Touza

Días de Rosalía e da Lingua Materna

Porque unha imaxe vale máis que mil palabras, porque a literatura e a música son creacións artísticas que se complementan, celebremos o Día da Lingua Materna e o Día de Rosalía (175 aniversario do seu nacemento) cunha pequena selección de vídeos e música.

Build your own custom video playlist at embedr.com best web hosting

SE QUERES ESQUECER AS GUERRAS, TRABALLA POLA PAZ

Hai guerras que temos esquecidas: non saen nos telexornais, ninguén fala delas, é como se non existiran mais seguen destruíndo pobos e vidas, seguen creando viúvas e orfos, mutilados e desarraigados... son conflitos que perderon a actualidade, que a distancia e a indiferenza cobren cun manto de silencio; podes coñecelos accedendo ao documento Guerras Olvidadas.

Ás veces preferimos a amnesia ou mirar para outro lado para tranquilizar as nosas conciencias, ás veces o benestar e o progreso do primeiro mundo nútrese do sangue dos países pobres e/ou sometidos a tiranías, ollos que non queren ver corazón que non sinte.

Algúns dos materiais cos que se fan os dispositivos tecnolóxicos dos que presumimos son extraídos en condicións infrahumanas e serven de fonte de financiamento de grupos armados, favorecendo o clima de violencia e as violacións de todo tipo de dereitos nos países de orixe, un caso: Congo, terra violada.

Manteñamos viva a memoria porque tamén nós fomos vítimas en tempos pasados, por exemplo en Mathausen: O comboio dos 927, ou na nosa propia terra soportando as consecuencias dunha guerra civil, entre elas un réxime autocrático.

Agora que acaba de morrer un paradigmático autócrata, o norcoreano Kim Jong-il, esta reportaxe do ano 2010 cobra renovada actualidade. É unha visión crítica do réxime e das condicións de vida dos seus cidadáns; ás veces as aparencias de paz son consecuencia do imperio do terror, hai mulleres e homes aos que non deixan vivir en paz, aos que obrigan a descansar en paz, na paz dos cemiterios.

Se de verdade queremos esquecer as guerras, só temos un camiño: traballar de xeito infatigable pola paz; se queres a paz, prepara a paz.

VALORES NON BOLSISTAS

Nestes tempos de ditadura de cifras, primas de risco, déficit cero e recortes cómpre examinar como andamos na estatística dos valores menos mercantilistas e máis éticos.

• A canto cotiza a nosa prima de risco bélico?

• Estamos recortando o noso estado de paz?

• Soben os valores da non violencia?

• Temos déficit de condutas humanas e superávit de polémicos comportamentos?

Para coñecer aspectos como os citados e outros similares podemos acudir ao Global Peace Index e consultar un mapa como o da imaxe superior (se queres velo ampliado preme aquí, se o prefires interactivo entra neste enlace)