AS ORIXES DALGUNHAS GUERRAS

Interesantes documentais que nos fan reflexionar sobre o sangue e a inxustiza que poden esconder algúns dos productos e obxectos que consumimos:

• R. D. Congo - Minerais de guerra 

• Coltan, comercio sanguento (Sangue nos nosos móbiles)

• Roubando África

• O lado escuro do chocolate

XANO, A ÁRBORE DA VERGOÑA E O TENDAL DA PAZ

Os Romanos ergueron o templo de Xano como lugar para facer as súas pregarias en tempos de guerra; por iso, na longa historia da civilización romana, este templo só puido pechar as súas portas en catro ocasións: a primeira na época do monarca Numa Pompilio, a segunda baixo o consulado de Tito Manlio, a terceira no 29 a. C. sendo emperador Augusto, e a última no 70 p. C. baixo o goberno de Vespasiano. Sumando todos estes períodos quizais esteamos a falar dun ano de peche en total, unha insignificante area de paz no vasto deserto das guerras.

Hoxe, 30 de xaneiro de 2014, as portas do tempo de Xano seguen abertas. No noso mundo máis de trinta conflitos manteñen aceso o lume da discordia, algúns deles ocupan as portadas dos medios de comunicación, outros perderon actualidade e permanecen soterrados (mais vivos) baixo a lousa do esquecemento.

As follas vermellas da árbore da vergoña queren lembrar varios deses conflitos que, larvados ou non, seguen a encher a macabra estatística da maldade do ser humano.

 

 
E ao carón da árbore da vergoña construímos o tendal da paz do que penduraremos follas brancas, cal pombas, coas mensaxes do que podemos facer, dende as nosas circunstancias e limitacións, a prol da paz para mellorar a estatística das bondades do ser humano e pechar as portas do templo de Xano.

Músicas de PAZ

23 de abril en Tui

Máis dun milleiro de escolares en representación dos centros educativos de Tui (CEIPs nº 1, 2, Guillarei, Pazos de Reis, Randufe e Rebordáns, CRA “Mestra Clara Torres”, Seminario Menor, Colexio Santa María, IES “Pérez Tizón” e “San Paio”) participaron na IV edición do “Tui Le: os libros na praza” ao longo da primaveral mañá deste 23 de abril.

Poemas de Rosalía, textos de Vidal Bolaño, músicas de violín e teclado, contos clásicos adaptados, Kamishibais... e intercambio duns mil libros, que serviron tamén para formar no chan da praza a palabra “LENDO”, deron vida e rexuveneceron as pedras do Tui histórico e monumental.

 

Ao final non houbo participación directa dos escolares da outra beira do Miño que si remesaron un pequeno texto de Eugénio de Andrade referido a Rosalía:

“Muitos sâo os caminhos que levam á poesía... Rosália chegou lá pela mâo de quem mal sabía ler e escrever; mâo de camponés, masa certa, sem dúvida; porque em matéria de amor e pobreza, de solidâo e morte, nâo sâo precisas muitas letras para se lhe conhecer o peso inteiro e o sabor”

Nun lateral da praza, colgadas dun biombo, estaban as ilustracións que os escolares fixeron das distintas estrofas do primeiro poema dos Cantares Gallegos.

En distintos momentos os medios de comunicación locais (Faro de Vigo, RMT) e a propia TVG nos programas Bos Días e A Revista fixeron conexións en directo pulsando opinións e recollendo o ambiente desta festa dos libros e da lectura á que desexamos MIL ABRILES MÁIS.

Libros de película

O éxito da recente curtametraxe Os fantásticos libros voadores mostra a actualidade e vitalidade dun subxénero de debuxos animados que da vida aos libros.

Para festexar o Día do Libro presentamos cinco vídeos con “libros viventes” como destacados actores:

• Have You Got Any Castles? (1938)

• Ex libris (1983)

• Dada (1994), unha curiosa historia na que a xente leva libros na cabeza como representación dos seus coñecementos.

• Library (2008), do chinés Yu Ming, que suxire que o cerebro de cada persoa é unha biblioteca, e que cada libro garda no seu interior lembranzas da risa, da ira, da tristura ou da felicidade.

• Mourir auprés de toi (Morrer ao teu lado, 2011) de Spike Jonze, na que se vive unha relación, de amor e paixón entre personaxes que saltan de entre as páxinas dos libros dun andel.

Como observamos a relación do cine e dos libros é de ida e volta: se hai moitas obras literarias inspiradoras de películas tampouco faltan os libros como protagonistas de filmes: películas de libros e libros de película, en fin.

Feliz Día do Libro 2013!

Constelación poética rosaliana

Magnífica constelación elaborada polas bibliotecas dos IES de Poio e "Ribeira do Louro" de O Porriño para celebrar os 150 anos da publicación de Cantares Gallegos. 

Grazas por compartir o voso traballo!

Alfabetización informacional

O traballo colaborativo de dúas bibliotecarias escolares: Olga Rodríguez, do CEIP Milladoiro (Malpica) e Charo Sánchez-Gabriel, do IES Sánchez Cantón (Pontevedra) acaba de dar un moi apetecible froito para a alfabetización informacional de cantos navegamos pola rede; coas súas orientacións melloraremos, sen dúbida, as nosas buscas no tupido bosque da internet. Grazas, Charo e Olga, por compartir os vosos coñecementos para que chegen ao maior número de usuarios das nosas bibliotecas.